11
Sep
2016

Խաչվերացի Տօնը

Կիրակի, 11 Սեպտեմբեր 2016-ին՝ Խաչվերացի տօնին առիթով, Մոնթրեալի Ս. Գրիգոր Լուսաւորիչ Առաջնորդանիստ Եկեղեցւոյ մէջ հանդիսաւոր սուրբ Պատարագ մատուցեց եւ յաւուր պատշաճի քարոզեց Գանատահայոց Թեմի Առաջնորդ՝ Գերշ. Տ. Աբգար Եպս. Յովակիմեանը: Սրբազան Հօր կողքին Սուրբ Սեղանին սպասարկեցին Եկեղեցւոյ Հոգեւոր Հովիւ՝ Տէր Հայ Արի Քհնյ. Թանաշեանը եւ Տէր Վազգէն Քհնյ. Պոյաճեանը, մասնակցութեամբ Եկեղեցւոյս սարկաւագաց դասին, իսկ Սուրբ Պատարագի երգեցողութիւնը կատարեց Եկեղեցւոյս Կոմիտաս Դպրաց Դասը։ Պատարագին ներկայ գտնուեցաւ նաեւ Տէր Զաւէն Ա. Քհնյ. Արզումանեանը
Սրբազան Հայրը իր քարոզին ընդմէջէն, սուրբ Պատարագին ներկայ գտնուող հաւատացեալներու հոծ բազմութեան, փոխանցեց Խաչվերացին խորհուրդը եւ իր հայրական պատգամը:
Սուրբ Պատարագի աւարտին կատարուեցան Ռեյհանի Օրհնութեան եւ Խաչվերացի Թափօրի արարողութիւնները: Թափօրի ընթացքին Սրբազան Հայրը օրհնելով աշխարհի չորս ծագերը, աղօթք առաքեց առ Աստուած. Հայաստանեայց Եկեղեցւոյ, Հայաստանի Հայրապետութեան եւ Հայ ժողովուրդին անդորրութիւն, անսասանութիւն, յառաջդիմութիւն եւ խաղաղութիւն խնդրեց:
Յաւարտ արարողութիւններուն, Եկեղեցւոյ Մարի Մանուկեան սրահին մէջ եւ կազմակերպութեամբ Ս. Գրիգոր Լուսաւորիչ Առաջնորդանիստ Եկեղեցւոյ նորակազմ «Հայ Ընտանիքի Օժանդակ Մարմին»-ի Աւանդական Մատաղ-Հարիսայի հիւրասիրութիւն եւ Հայկական ուտեստեղէններու վաճառք տեղի ունեցան:
Սրբազան Հայրը օրհնելով Մատաղ-Հարիսան, Խաչվերացի Տօնին առիթով շնորհաւորեց ներկաները եւ գնահատեց կազմակերպիչներուն աշխատանքը, իսկ Տէր Հայ Արի Քհնյ. Թանաշեանը իր խօսքին ընդմէջէն ներկաներուն փոխանցեց «Հայ Ընտանիքի Օժանդակ Մարմին»-ի հիմնադրման դրդապատճառները, նպատակներն ու յառաջիկայի ծրագիրը: