30
Oct
2016

Ս. Գրիգոր Լուսաւորիչ Առաջնորդանիստ Եկեղեցւոյ Տարեկան Պազար

Ս. Գրիգոր Լուսաւորիչ Առաջնորդանիստ Եկեղեցւոյ Տարեկան Պազարը տեղի ունեցաւ Շաբաթ, 29 Հոկտեմբեր եւ Կիրակի, 30 Հոկտեմբեր 2016-ին:
Տարեկան Պազարի պաշտօնական բացումը կատարուեցաւ Շաբաթ, 29 Հոկտեմբեր առաւօտեան ժամը 10:00-ին, Արժ. Տ. Հայարի Քհնյ. Թանաշեանի օրհնութեամբ եւ աղօթքով «Մարի Մանուկեան» սրահին մէջ, նախագահութեամբ՝ Տօքթ. Մատլէն Կարտուշի:
Նախքան բացումը Ատենապետուհի՝ Տիկ. Զուարթ Թագւորեան գնահատական խօսքերով իր երախտագիտութիւնը յայտնեց Տիկնանց Յանձնախումբի բոլոր անդամուհիներուն, օժանդակ տիկիններուն, նուիրատուներուն, Ծխական Խորհուրդին եւ բոլոր անոնց որոնք սիրայօժար կերպով սատարեցին Եկեղեցւոյ Պազարի յաջողութեան:
Ապա, Տէր Հօր կողքին Օրուան Պատույ Հիւր՝ Տօքթ. Մատլէն Կարտուշ արտայայտեց իր սրտի խօսքը եւ կատարեց հանդիսաւոր բացման ժապաւէնի յատումը, շրջապատուած Տիկնանց Յանձնախումբի եւ օժանդակ տիկիններով:
Կիրակի, 30 Հոկտեմբեր 2016-ին, յաւարտ Ս. Պատարագի տեղի ունեցաւ Հոգեհանգստեան պաշտօն, մեզմէ առ յաւէտ բաժնուած նախկին Տիկնանց Յանձնախումբի անդամուհիներուն՝ անթառամ յիշատակին:
Զոյգ օրերու ընթացքին Եկեղեցւոյ Տարեկան Պազարը արձանագրեց բացառիկ յաջողութիւն, շնորհիւ նուիրեալ անձնաւորութիւններու տքնաջան աշխատանքին:
Մեր խորին շնորհակալութիւնը Տ. եւ Տիկ. Շահան եւ Աշխէն Կազերեանին, Տ. եւ Տիկ. Յակոբ Գազանին, Տիկ. Անի Շէնօղլուին, որոնք սիրայօժար կերպով ինչպէս՝ ամէն տարի, այս տարի եւս ի գործ դրին Տարեկան Պազարի Շաբաթ օրուան ճաշի պատրաստութիւնն ու սպասարկութիւնը:
Մեր խորին շնորհակալութիւնը նաեւ՝ մեր համակիր եւ օժանդակ տիկիններուն, որոնք ստանձնեցին Պազարի Կիրակի օրուան ճաշի պատրաստութիւնն ու սպասարկութիւնը:
Մեր սրտագին շնորհակալութիւնը մասնաւորաբար Օրուան Նախագահ՝ Տօքթ. Մատլէն Կարտուշին, Տիկնանց Յանձնախումբին, օժանդակ տիկիններուն, բոլոր նուիրատուներուն եւ բոլոր անոնց, որոնք նիւթապէս եւ բարոյապէս նպաստեցին Տարեկան Պազարի յաջողութեան, ի փառս՝ Հայց. Առաք.Եկեղեցւոյ պայծառւթեան եւ առաքելութեան: